Omutaka James Mubiru Zziikwa V, Gabunga ow’omulundi ogwa 38 mu Kika ky’Emmamba
Kkooti ya Kisekwa evunaanyizibwa okusala emisango gy’ebika mu Buganda esazeewo ku musango ogwabadde gukwata ku Kasolya mu Kika ky’Emmamba, era ekakasizza nti James Mubiru ye Gabunga omutuufu.
Kkooti etegeezezza nti Omutaka James Mubiru Zziikwa V, Gabunga ow’omulundi ogwa 38, ye musika wa Gabunga Yosiya Kasozi eyali Gabunga ow’omulundi ogwa 36.
Kkooti egambye nti okuteekebwawo kwa Mubiru kwatambulira mu mateeka, era kikakasiddwa mu kiraamo kya Yosiya Kasozi.
Abawaabi ababadde beemulugunya okuli Erusania Ssevviiri Galiwango, Ruth Ndagire, Alex Ndiwalana ne Ruth Mirembe baalumirizanga nti okuteekako Mubiru kyakolebwa mu bukyamu, kubanga si ye yandibadde musika.
Naye Omuk. Dr. Robert Ssonko — Kisekwa — yategeezezza nti mu kiraamo kya Gabunga Yosiya Kasozi, yalambika bulungi nti James Mubiru ye musika we. Yagasseeko nti ensala z’okusalibwawo mu Kkooti ya Kisekwa zigenderera okuluŋŋamya, so si bya kwawula kika.
Kkooti ya Kisekwa eyasala omusango gwa Gabunga.
Oluvannyuma lw’ensala, Katikkiro w’ekika ky’Emmamba, Gerald Kaberenge, yalangiridde nti ab’ekika basaanidde okubeera abamu kubanga bamusaayi gumu. Yategeezezza nti ebyo ebiyinza okubaawula, basaanidde okubitwala ku mabbali era bazimbe Kika mu buwanguzi.
Omusango guno gututte emyaka egisoba mu 12 nga guwulirizibwa n’okunonyerezebwako okusobola okutuuka ku kinyusi ky’ensonga n’okumanya ensonga entuufu, oluvannyuma ezeesigamiziddwako ensala ewadde oludda oluwawabirirwa obuwanguzi mu musango guno.
Ensala eyo yasayiniddwaako n’omubaka w’abakungu abawerako, omuli:
Omuk. Joshua Kateregga (Kisekwa omuwummuze), Omuk. Lubega Ssebende (omuwandiisi wa kkooti), Omuk. Wilson Ssentongo, Omuk. Jamil Ssewanyana, Samuel Walusimbi, George Makumbi, Deogratius Kasozi ne Salim Makeera.
Ensala eno eteereddwako emikono omubadde; Omukungu Joshua Kateregga ono ye Kisekwa omuwummuze, Omuk. Lubega Ssebende omuwandiisi wa kkooti, Omuk. Wilson Ssentongo, Omuk. Jamil Ssewanyana, Samuel Walusimbi, George Makumbi, Deogratius Kasozi ne Salim Makeera.