Buganda Minisita, Oweek. Choltilda Nakate Kikomeko ng’asoma obubaka bwa Nnaabagereka
Nnaabagereka Sylvia Nagginda akubirizza abazadde okuwagira abaana baabwe okuzuula ebitone byabwe n’obusobozi bwabwe obw’enjawulo, era babasigemu obuntu bulamu.
Bino Maama Nnaabagereka abitadde mu bubaka obusomeddwa Oweek. Choltilda Nakate Kikomeko ku mukolo gw’okutuuza Nnalulungi w’Ebyobulambuzi mu Buganda 2025 ogubadde ku Hotel Africana.
Nnalulungi w’Ebyobulambuzi mu Buganda alangiriddwa n’aweebwa emmotoka empya ddala
Nambaziira Joan, eyeddira Nnyonyi Nnyange, ava Buluuli, y’alangiriddwa okubeera Nnalulungi w’Ebyobulambuzi mu Buganda 2025 asinze banne 36 okuva mu Masaza ag’enjawulo nga bwe babadde bavuganya.
Ono aweereddwa emmotoka kapyata emuyambeko okutuukiriza obuvunanyizibwa obumwolekedde.
Nabukenya Mercy owa Ngabi, ava Kabula, y’akutte ekyokubiri, ate Navvubya Vanisha Leticia ava Busujju n’akwata ekyokusatu.