Wano Owek. Joseph Kawuki yabadde mu Ssaza ly’e Singo
Minisitule ya Gavumenti ez’Ebitundu mu Bwakabaka ekyabakanye ne kaweefube w’okubangula Abaami ba Kabaka ku mitendera gyonna mu Masaza ga Buganda.
Ssabbiiti eno, kaweefube ono ayindira mu Ssaza Singo, nga akulembeddwamu Minisita wa Gavumenti ez’Ebitundu n’ensonga za Buganda ebweru, Owek. Joseph Kawuki. Ku bbalaza, yasisinkana Ggombolola ezisangibwa mu Disitulikiti y’e Mityana ne Kassanda.
Enteekateeka eno agitutte Kyankwanzi, ng’olukungaana olw’awamu lukubiddwa ku Mbuga ya Ggombolola Mutuba IV Ntwetwe. Eno gy’asisinkanidde Ggombolola ez’enjawulo okuli: Mutuba 9 Mulagi, Wattuba, Mutuba 15 Kyankwanzi, Mutuba 14 Nsambya, Butemba ne Gayaza.
Minisita Kawuki bano abalaze obukulu bw’ensisinkano zino ezigendereddwamu okubangula Abaami ba Kabaka okwongera amaanyi mu buweereza bwabwe, okukumaakuma Abantu ba Buganda, okuggusa enteekateeka z’Obwakabaka ku bantu yonna gyebali, okuzimba obukulembeze obugundiivu okuviira ddala wansi ku kyalo okutuuka waggulu, okwetunulamu mw’ebyo byebakoze nga beewa obubonero, era n’okutetenkanya engeri y’okusitulamu omutindo gw’obuweereza bwabwe, n’okutuuza enkiiko mwebateeseza ensonga z’Obwakabaka.
Abakubirizza okwenyumiriza mu kubeera Abaami ba Kabaka, wabula balekere awo okusinda ebibasomooza naye bateme empenda ezibivuunuka. Kyokka mu buweereza bwabwe, beewalire ddala okuteekamu eby’obufuzi ebyawula mu bantu kubanga Ssaabasajja Kabaka wa bantu bonna, naddala abali mu Buganda.
Abamu ku Baami ba Kabaka mu Ssaza Singo
Abakuutidde obutatwalirizibwa na buli kintu ekiteekebwa ku mitimbagano, wabula bagoberere emikutu gy’Obwakabaka bafune amawulire ageesigika.
Abeebazizza ennyaniriza ennungi gyebaalaga Kabaka bweyabakyalirako mu 2017. Abategeezezza nti kino kibawa okusoomooza oba ne mu kiseera kino basobola okuddamu okumwaniriza bwe batyo.
Mukwenda, Owek. Deogratious Kagimu, yeebazizza Abaami bano olw’obujjumbize eri emirimu gya Ssaabasajja Kabaka, era n’abakubiriza obutaddirira, olwo Buganda edde ku ntikko.