Mmamba ajaguza obuwanguzi mu mizannyo gy’ebika bya Buganda 2025 e Rinkeby mu Sweden
Abantu ba Ssaabasajja abawangaalira mu Ssaza Scandinavia beetabye mu mizannyo gy’Ebika by’Abaganda egyategekebwa mu kibuga Rinkeby, mu ggwanga lya Sweden.
Bazzukulu ba Gabunga ab'e Mmamba be baavuddeyo nga bannantameggwa b'omwaka; Embogo yakutte kyakubiri, e Ffumbe kyakusatu.
Omutaka Kayiira Gajuule, omukulu w'Ekika ky'Embogo, y'abadde omugenyi omukulu, era yeebazizza abategesi olw’enteekateeka ennungamu. Naye n’asaba balyoke bongeremu ebirungo mu mizannyo gino mu myaka egijja.
Omubaka wa Ssaabasajja Kabaka mu bitundu by’e Scandinavia, Owek. Nelson Mugenyi, yeebazizza nnyo jjajja Kayiira n’abantu bonna abeetabye mu mizannyo gino olw'okunnyikiza obumu mu bantu ba Kabaka.